Համաստեղի «Աստղկան սայլը» պատմուածքի հետքերով, 2007

ՀԱՄԱՍՏԵՂԻ «ԱՍՏՂԿԱՆ ՍԱՅԼԸ» ՊԱՏՄՈՒԱԾՔԻ ՀԵՏՔԵՐՈՎ

Համաստեղի «Աստղկան սայլը» պատմուածքը հայ գրականութեան մէջ հէքեաթի ու իրականութեան աներեւոյթ սահմանի վերհանման բարձրագոյն արտայայտութիւններից է: Հետաքրքիր են նրա թէ՛ հէքեաթային, թէ՛ փիլիսոփայական ակունքները բացող արահետները: Այն յափշտակում է մանուկներին եւ մեծերին, քանի որ դէպի երազանքը մարդու անդուլ ձգտումի գեղարուեստական վկայութիւնն է, իսկ միշտ ճամբաբաժնին կանգնած է իրականութիւնը:
«Սփիւռք» Գիտաուսումնական Կենտրոնում տարիների աւանդոյթ ունեն սփիւռքահայ գրականութիւնից յայտարարուող ստեղծագործական մրցոյթները, որոնց նպատակն է յատկապէս ուսանողներին ընտանի դարձնել արեւմտահայ արդի գրական արժէքներին, վերարթնացնել նրանց մէջ ստեղծագործական հակումներ:
Այս անգամ Խ. Աբովեանի անուան մանկավարժական համալսարանի բանասիրական բաժանմունքի 5-րդ լսարանի սաներին դասախօս Սուրէն Դանիէլեանը յանձնարարել էր «մրցել» հենց Համաստեղի հետ՝ ստեղածագործական նոր տեսողութեան ենթարկելով «Աստղկան սայլը» պատմուածքը:
Նախատեսուած էին մրցանակներ, ընդ որում գլխաւոր մրցանակները սահմանել էին Բէյրութից Արամ Սեփեթճեանը եւ Լոս Անճելըսից Մայք Եուսուֆեանը: Խիստ անհատականացած մօտեցումներով ներկայացուած էին միմեանցից տարբեր 19 աշխատանքներ: Ի յայտ եկանք երկու յաղթողներ:
Հանդիսութեանը հաճելի անակնկալ էր Արամ Սեփեթճեանի ներկայութիւնը, որը անձամբ յանձնեց յաղթող ուսանողուհի Հերմինէ Միքայէլեանի պատուաւոր մրցանակը: Գլխաւոր մրցանակակիրներից Սուսան Աղէկեանը արժանացաւ Մայք Եուսուֆեանի համարժէք պարգեւին: Միւս մասնակիցները ստացան խրախուսական մրցանակներ՝ Շահան Շահնուրի, Ռոպէր Հատտէճեանի, Զարեհ Խրախունու ժողովածուներից եւայլն:
Մթնոլորտը հաճելի էր ու ջերմ, տրամադրութիւնը՝ բարձր ու տօնական, ինչին էապէս նպաստեց արեւմտահայերէնին ներյատուկ բառով «սիրոյ սեղանը», որը բացուեց Կենտրոնում: