Հանդիպում Սալբի Դարակչեանի հետ, 2006թ.

ԱՐԵՒՄՏԱՀԱՅ ԲԱՆԱՍՏԵՂԾՈՒԹԵԱՆ ԵՒ ՍԱԼԲԻ ԴԱՐԱԿՉԵԱՆԻ ՀՄԱՅՔԸ

Սեպտեմբերի 12-ին «Սփիւռք» Գիտաուսումնական Կենտրոնում տնօրէն Պրօ‎ֆ. Սուրէն Դանիէլեանի նախաձեռնութեամբ տեղի ունեցաւ հանդիպում Հալէպից ժամանած ասմունքի վարպետ Սալբի Դարակչեանի եւ պետական մանկավարժական համալսարանի բանասիրական մասնաճիւղի ուսանողների հետ:
Նախ, շահեկան զրոյց ծաւալուեց արեւմտահայ բանաստեղծութեան ակունքների, զարգացումների, իւրայատկութիւնների մասին: Ուսանողների սիրուած դասախօսը ներկայացրեց Օրիորդ Սալբիի` դեռեւս ոչ այնքան հարուստ, բայց արդէն յագեցած ստեղծագործական աշխարհը, նախասիրութիւնները եւ ձեռք բերած փորձը: Ուսանողները դրանում անմիջապէս համոզուեցին, երբ լսեցին սփիւռքահայ արուեստագիտուհու հմայիչ ու ձգողական ասմունքը: Նրանց ծաւի աչքերի առջեւ կարծես տողանցք բռնեցին արեւմտահայ եւ սփիւռքահայ յայտնի բանաստեղծները՝ Ռ. Սեւակը, Զահրատը, Դ. Վարուժանը, Սիամանթօն, Մ. Իշխանը, Շ. Շահնուրը եւ Վ. Թէքէեանը:
Աւարտական բաժնի ուսանողներ Նոնա Ստամբոլցեանը եւ Լուսինէ Սարգսեանը գնահատութեան իրենց խօսքում արժեւորելով Սալբիի ասմունքը, այն դիտեցին որպէս սփիւռքահայ գրականութեան «ընդհատուած» դաս, որը հնարաւորութիւն տուեց համադրելու Պրօֆ. Սուրէն Դանիէլեանի վերլուծութիւնները Սալբի Դարակչեանի հոգեթով, դրամատիկ մեկնաբանման հետ:
Ուսանողների համար յիշարժան են նման կարգի ուսանելի հանդիպումները մասնաւորապէս այժմ, Գրերի գիւտի 1600-ամեակի օրերին։ Նրանք ընդամէնը մի քանի ամիս առաջ ուխտագնացութեան էին մեկնել Օշական՝ Սուրէն Դանիէլեանի գլխաւորութեամբ։
Ինչպէս նշեց իր ամփոփիչ խօսքում «Սփիւռք» Կենտրոնի տնօրէնը, ճանաչողական նման հանդիպումներում է ձեւաւորւում վաղուայ ուսուցչի նուիրուածութիւնն իր ասպարէզին: