Ութերորդ դասընթացներ

 

Յունուարի 10 - Փետրուարի 08
2007 թուական

Խ. Աբովեանի ան. հայկական պետական մանկավարժական համալսարանը հետեւողական ուշադրութիւն է դարձնում ուսուցիչների ետբուհական վերապատրաստութեան ուղղութիւններին։ «Սփիւռք» Գիտաուսումնական Կենտրոնը համալսարանի այն օղակն է, որը շարունակում է հայրենի ուսուցիչների հետ աշխատանքը, ընդ որում՝ կարեւորում է նրանց՝ արեւմտահայ հանրակրթական առարկաներից մասնագիտական վերազինումը։
Այս տարի Երեւանի հանրակրթական դպրոցների 33 ուսուցիչների համար կազմակերպուած արեւմտահայ լեզուից եւ գրականութիւնից 8րդ դասընթացների հովանաւորությունն առաջին անգամ իր վրայ վերցրեց Սուրիայի հեռաւոր սահմանային Թել Աբիաթի գիւղի համայնքապետ Յակոբ աղայ Սաղաթելեանը:

 

 

***

Անցեալ չունեցող, անցեալի բոցերում չխմորուած եւ հոգում այդ անցեալը որպէս դրոշմ չդաջած ժողովուրդը ապագայ ունենալ չի կարող: Յաճախ ենք լսում եւ լուռ համակերպւում:
Սակայն այդ անցեալից մենք մեզ հետ կիսատ պռատ ենք բերել մեր արեւմտահայերէնը, դասական ուղղագրութեան մասին պատկերացումները, արեւմտահայ եւ սփիւռքահայ գրողներին, այսինքն՝ «մոռցուած» եւ «կարօտի» հոգեւոր երկիրը:
Տարիներ շարունակ դասաւանդելով դպրոցում, կրթելով նոր սերնդին՝ մենք հասկանում էինք, որ անջրպետ էր բացուել, եւ «դրսի» աշխարհը այսօր էլ խորթ է ուսուցիչներիս, էլ ուր մնաց աշակերտների համար:
Ասում են՝ առիթ կայ, որ պատճառ արժէ: «Սփիւռք» Գիտաուսումնական Կենտրոնը հենց եղաւ որսուած այդ առիթը, եւ ժամանակի թելադրանքն էր, որ ստիպեց հայրենի ուսուցիչներին՝ խորապէս ճանաչելու արեւմտահայ լեզուի ու գրականութեան այժմէական խորհուրդները:
Բացառիկ երեւոյթ. դասընթացներին համախմբուած էին Սփիւռքի եւ Հայաստանի լաւագոյն մասնագէտները: Երբ ձեռք ես բերում ոչ միայն գիտելիք, այլեւ անհուն սէր իր ողջ «գունապնակով» քեզ համար նոր բացուող գրական աշխարհի հանդէպ, ինքդ զգում ես քո ներքին հասունացումը։
Այսօր իմ հոգում առաւել պատկերաւոր են Համաստեղի «գիւղն» ու Յակոբ Օշականի «քոքուրները»: Եւ դա՝ շնորհիւ «Սփիւռք» Կենտրոնի, որը կարծես յուսոյ հանգրուան է երկու «աշխարհների» արանքում:

Աննա ՎԱՐԴԱՆԵԱՆ
Երեւանի թիւ 102 դպրոցի հայոց լեզուի եւ գրականութեան ուսուցչուհի


* * *

Բազմիցս ներկայ եմ գտնուել առարկայական տարաբնոյթ վերապատրաստութիւնների: Սովորաբար դրանք նորարական մեթոդներին են վերաբերում, այս մէկը, սակայն, միտուած է ուսուցչի մասնագիտական որակների կատարելագործմանը, կրթական հին սխալների շտկմանը:
Ահա թէ ինչու այս մէկն առաւել տպաւորիչ է ու ներդաշնակ հոգուս:
«Սփիւռք» Գիտաուսումնական Կենտրոնի հիւրընկալ յարկի տակ ստեղծուել էր ուսուցչական առողջ մթնոլորտ, բարեկամութիւն, յարգանք: Խոստովանում եմ, այստեղ մեծ չափով փոխուեցին գրականութեան ընկալումներիս չափորոշիչները, ձեռք բերեցի արեւմտահայ լեզուի, արեւմտահայ եւ սփիւռքահայ գրականութեան ճանաչողութիւն, ինչը ուսումնառութեան տարիներին մնացել էր թերի:

ԼԻԱՆԱ ՍԱՀԱԿԵԱՆ
Երեւանի թիւ 200 դպրոցի հայոց լեզուի եւ գրականութեան ուսուցչուհի

 

 

* * *

Ձմեռային մի շունչ դադար, հանգստի, ամանորեայ սպասուած պահեր, տարե-մուտի հաշուեկշիռ ու նոր տարուայ անորոշ ակնկալիքներ ...
2007-ի Յունուարի 10-ը ... Ցուրտ ու անտրամադիր մի առաւօտ, երբ յոգնութիւնդ ու եղանակը հարկադրում են գերադասել տան մտերմիկ ջերմութիւնը եւ առժամանակ մոռանալ դրսի աշխարհի գայթակղութիւնները:
Առաջին միտքս հրաժարուելն էր, սակայն պատասխանատուութեան զգացումս յաղթեց, եւ երկար թուացող ճամբան ու ցուրտը անմիջապէս մոռացուեցին մանկավարժական համալսարանի դռների ետեւում:
Ս. Դանիէլեանի, Վ. Գաբրիէլեանի, Եու. Աւետիսեանի, Ա. Եղիազարեանի, Լ. Մուրադեանի, Կ. Աղաբեկեանի, սփիւռքահայ մեր բարեկամ Երուանդ Ազատեանի եւ միւսների մտքերի լուսածիրները մեզ ետընթաց հասցրեցին Արեւմտեան Հայաստան, ապա նետեցին աշխարհասփիւռ գաղթօջախներ:
Ամէն կեանք՝ մի պատմութիւն, ամէն գրող՝ իր ժողովրդի հայելային արտացոլանքը՝ իւրովի, պայծառ, շքեղ, առնական ու քնքուշ, թախծալից ու որոտացող:
Մեկամսեայ դասընթացը մեկօրեայ արագութեամբ սլացաւ եւ այնպէս անսպասելի աւարտուեց, որ անհամար «ինչուներ», «աւաղներ» ու «եղուկներ» մնացին անպատասխան: Կարծում ենք՝ շատ քիչ էր այս ժամանակահատուածը ...
Ցաւող սիրտս անդիմադիր մի բերկրութեամբ ելք էր փնտռում. ե՞րբ կը հասնեմ երեխաներին, որ թեթեւացնեմ բեռս, որ նրանց էլ վարակեմ իմ անբուժելի խենթ «հիւանդութեամբ» ...
Ուռճացող սիրտս ուրախութեամբ, ինչպէս կը գրէր Ռոպէր Հատտէճեանը, եռեւեփում, ելվերում եւ պանծացող շանթեր է նետում դէպի հեռուները, ուր աստիճանաբար ուրուագծւում է միասնական լեզու ու տարածք երազող ժողովրդիս հայանուն քարտէսը՝ «նահանջ» բառը յընթացս սրբելով սփիւռքահայութեան ճակատից ...

Բիւրեղիկ ՄԱՐԳԱՐԵԱՆ
թիւ 141 դպրոցի հայոց լեզուի եւ գրականութեան ուսուցչուհի

 

 

Վկայագրեր ստացած ուսուցիչների ցանկ

1. Ազատեան Լուսինէ / Երեւանի թիւ 128 միջն. դպրոց
2. Ալլահվերդեան Փառանձէմ / Երեւանի թիւ 192 միջն. դպրոց
3. Առաքելեան Արաքսեայ / Երեւանի թիւ 103 միջն. դպրոց
4. Ասատրեան Գայիանէ / Երեւանի թիւ 19 միջն. դպրոց
5. Ասլիբեկեան Թերէզ / Երեւանի թիւ 68 միջն. դպրոց
6. Բաղեան Ամալիա / Երեւանի թիւ 60 միջն. դպրոց
7. Բադիրեան Գայիանէ / Երեւանի թիւ 53 միջն. դպրոց
8. Գալստեան Արմինէ / Երեւանի թիւ 47 միջն. դպրոց
9. Գասպարեան Սոֆիա / Երեւանի թիւ 18 միջն. դպրոց
10. Գէորգեան Գայիանէ / Երեւանի թիւ 25 միջն. դպրոց
11. Էլմայեան Էլիզա / Երեւանի թիւ 84 միջն. դպրոց
12. Կարապետեան Հերիքնազ / Երեւանի թիւ 118 միջն. դպրոց
13. Կիւրեղեան Սեդա / Երեւանի թիւ 179 միջն. դպրոց
14. Ղազէեան Մարգարիտ / Երեւանի թիւ 66 միջն. դպրոց
15. Մանուկեան Յասմիկ / Երեւանի թիւ 90 միջն. դպրոց
16. Մանուկեան Փիրուզ / Երեւանի թիւ 162 միջն. դպրոց
17. Մանասէրեան Մարուշ / Երեւանի թիւ 54 միջն. դպրոց
18. Մարգարեան Բիւրեղիկ / Երեւանի թիւ 141 միջն. դպրոց
19. Միրզոյեան Գայիանէ / Երեւանի թիւ 49 միջն. դպրոց
20. Միրզոյեան Սուսան / Երեւանի թիւ 150 միջն. դպրոց
21. Մկրտչեան Սվետլանա / Երեւանի թիւ 127 միջն. դպրոց
22. Յակոբեան Արաքսեայ / Երեւանի թիւ 74 միջն. դպրոց
23. Յակոբեան Մարգարիտ / Երեւանի թիւ 117 միջն. դպրոց
24. Յովհաննիսեան Մանուշակ / Երեւանի թիւ 126 միջն. դպրոց
25. Յովսէփեան Խոնարհ / Երեւանի թիւ 145 միջն. դպրոց
26. Շահինեան Մարիէտ / Երեւանի թիւ 142 միջն. դպրոց
27. Պետրոսեան Սիրանուշ / Երեւանի թիւ 85 միջն. դպրոց
28. Սահակեան Արմինէ / Երեւանի թիւ 64 միջն. դպրոց
29. Սահակեան Լարիսա / Երեւանի թիւ 71 միջն. դպրոց
30. Սահակեան Լիանա /  Երեւանի թիւ 200 միջն. դպրոց
31. Սահակեան Յասմիկ / Երեւանի թիւ 111 միջն. դպրոց
32. Վարդանեան Աննա / Երեւանի թիւ 102 միջն. դպրոց
33. Տիգրանեան Գայիանէ / Երեւանի թիւ 144 միջն. դպրոց