Նորութիւններ

ԱԶԳԱՅԻՆ ՀՊԱՐՏՈՒԹԵԱՆ Օ՛Ր ԷՐ, ԱՆԿԱՍԿԱԾ

02 Հոկտեմբեր 2012

ՅԱԿՈԲ ՎԱՐԴԻՎԱՌԵԱՆ, Նիւ-Ջըրզի

  Սեպտեմբեր 28, երեկոյեան Հարաւային Քընեթիքըթի Նահանգային համալսարանը ապրեցաւ հայկական օրեր: Աւելի քան 12 հազարնոց համալսարանի 53-ամեայ նորանշանակ նախագահուհիին` դոկտ. Մէյրի Փափազեանի ուխտառութեան օրն էր: Ան կը հանդիսանայ ամերիկահայ առաջին կին նախագահուհին ամերիկեան համալսարանի մը, այդ ալ Նիւ Ինկլընդի այլապէս հարուստ համալսարանական շրջանակէ մը ներս, ոչ այնքան հեռու Պոստոնէն ու Նիւ Եորքէն: Նիւ Հեվընի այս քաղաքի պարծանքը դարձող այս համալսարանը իր 120 տարիներու պատմութեամբ կ՚ունենայ իր 11-րդ նախագահը:
  Սրահը լեցուն է. նախ` 1500 է աւելի դասախօսներով, որոնք համապատասխան իրենց տարազներով կը գունաւորեն հսկայ դահլիճը: Անոնց մէջ են Երեւանի Խաչատուր Աբովեանի անուան պետական մանկավարժական համալսարանի ռեկտորըՙ դոկտ. Ռուբէն Միրզախանեան, Հայաստանի ազգային ակադեմիայի արտասահմանեան անդամ Երուանդ Ազատեանը:
  Ներկայ մեր հայրենակիցները եկած էին առաւելաբար Նիւ Եորքէն ու Նիւ Ճըրզիէն: Նախագահուհիին ամուսինը` դոկտ. Դենիս Փափազեան նախկին աւագ սպարապետն է Վարդանանց ասպետներու եղբայրակցութեան, որ հայրենասիրական իր աւանդոյթներով ունի մասնաւոր տեղ մը ամերիկահայ ազգային կեանքէն ներս:
Ամերիկայի Արեւելեան թեմի հայոց առաջնորդ Խաժակ արք. Պարսամեանի բացման աղօթքով սկսաւ օրուան տպաւորիչ հանդիսութիւնը:
  Համալսարանի զանազան բաժանմունքներու, կրթական ու վարչական զանազան պատասխանատուներու, ինչպէս` նահանգի փոխկառավարիչ Նենսի Ուաեմընի, Էրըն   ՄգԿուկընի խօսքերէն ետք բեմ հրաւիրուեցաւ դոկտ. Մէյրի Փափազեան, որ ա՛յնքան ինքնավստահ տուաւ իր նախագահական խօսքը: Ան, մանաւանդ շեշտեց Հայոց ցեղասպանութեան իրողութիւնը, հայերու տեղը հին ազգութիւններու շարքին եւ Նոյի հարազատներ որպէս Հայկական բարձրաւանդակէն նոր աշխարհ եկող որպէս առաջին ժողովուրդ կապեց համայն մարդկութիւնը Նոյի սերունդին: Տուաւ իր ծրագիրները համալսարանը բարձորակ ուսումնական հիմնարկի մը վերածելու եւ ամերիկեան կրթական մակարդակը իր աւանդոյթներուն վերադարձնելու ուղղութեամբ:
  Մէյրին Լոս Անջելըսի կրթանուէր ու հայրենասէր տէր եւ տիկին Յակոբ Արշակունիներու զաւակը յաճախած է Ամերիկայի առաջին հայկական վարժարանը` Ֆերահեան: Այնուհետեւ որպէս կրթական մշակ եւ անգլիական գրականութեան մա՛նաւանդ 17-րդ դարու մասնագէտ, միացած է զանազան համալսարաններու, ինչպէս` Նիւ Եորք համալսարանի Լիմըն Քոլէճին:
  Նախորդ օրը, կէսօրէ ետք, վարժարանի Ջոն Լայմըն կեդրոնի մէջ բացումը կատարուեցաւ հայկական կերպարուեստի ցուցահանդէսին, որ պիտի շարունակէ մեր ժամանակակից արուեստագէտներու գործերը ցուցադրել մինչեւ Հոկտեմբեր 21: Ցուցահանդէսին կազմակերպումը յանձնուած էր նիւ-ջըրզիաբնակ ծանօթ ազգային, կերպարուեստի գնահատող տիկին Շողակ Յովհաննէսեանին:
  Անկասկած, ազգային հպարտութեան օր մը եղաւ: Հայեր շրջապատած իրենց սիրելի ազգակիցը` Մէյրին, լեցուն հայրենասիրութեամբ, ապրեցան օրուան խորհուրդը: Մինչ ի՛նքը` նախագահուհին, ամենայն համեստութեամբ ու սրտբաց ողջունեց իւրաքանչիւրը: Պատմական օր մըն էր ամերիկահայութեան համար: Առաջին անգամ ըլլալով հայուհի մը կը դառնար մեծ համալսարանի մը տնօրէնուհին: